أسرار مكافآت خدم نظام مبارك فى "طرة" .. كم يتقاضى خادم "العادلى" ؟

كشف إسلام عبدالله، 31 سنة، وهو أحد المفرج عنهم حديثاً من السجن ، حيث كان يقضى مدة عقوبته "خادما" لرموز نظام مبارك فى سجن طره ، عن كواليس كثيرة لحياة رموز نظام مبارك فى السجن ، وكان على رأسها تخصيص خدم من السجناء الفقراء لسجناء النظام السابق ، وذلك نظير مبالغ مالية يدفعها رجال الأعمال والوزراء والمسئولين المسجونين.

وقال اسلام :" أكتر واحد بيدفع فلوس للخادم بتاعه هو هشام طلعت مصطفى رجل الأعمال" ، فهو يدفع للخادم، ويدعى أحمد، مبلغ 1200 جنيه شهريا، بالإضافة لمبلغ 100 جنيه يصرفها السجن لمساجين الأشغال، «وهشام طلعت هو أكرم وأنزه واحد فى اللى شفتهم فى السجن، بيدفع للعسكرى اللى معاه فلوس كتير، وكل اللى هو عاوزه بيعمله، وكل طلباته من الكانتين والكافيتريا مجابة على حساب هشام طلعت، طبعا غير لما ييجى حد يزور هشام كان كل مرة يدفع فيها 200 جنيه للخادم.

 ولفت اسلام إلى أن الشخص الذى يأتى بعد هشام طلعت، هو أحمد المغربى، وزير الإسكان السابق، "بيدفع للخادم اللى معاه 1000 جنيه شهريا، بس لما كان بتجيله زيارة كان بيدفعله كل مرة 500 جنيه، ده غير مصاريفه الشخصية وسجائره ومشترواته من الكانتين، والوجبات اللى بتجيله، والمغربى كان بيدفع لكل المساجين فلوس بصراحة، خصوصا اللى حالهم على قدهم، كان عامل لناس شهريات حوالى 30 جنيه فى الشهر لكل واحد، وفى المواسم والمناسبات كان بيجيب لهم الأكل والوجبات، وفى مرة المغربى كان معاه عسكرى بيخدمه لما خلص خدمته معاه جاب له عربية هيونداى فيرنا، وسلمه ورقها ومفاتيحها أمام الجميع وقال له: عربيتك واقفة برة ودى المفاتيح والورق بتاعها".

واستطرد اسلام :" أما حبيب العادلى فكان يدفع للخادم اللى بيخدمه 900 جنيه فى الشهر، وكل زيارة كان بيديله 200 جنيه، بس الخادم ده كان اسمه شريف عبدالفتاح، أى حد فى السجن مهما كان ما كانش يقدر يكلمه، ولا يفتح بقه معاه، وكان بيريحه آخر راحة وما بيطلعش أى أشغال فى السجن زى باقى المساجين، وحبيب العادلى فى السجن بيعامل على إنه وزير الداخلية بالظبط، كل الناس بتديله التحية العسكرية ومفيش حد بيقوله غير يا حبيب باشا ويا افندم، وهو ما بيطلبش حاجة من حد، لكنه بيصدر أوامر كل اللى موجودين بيسمعوها وينفذوها فى الحال، حتى زياراته كلها بتتم فى غرفة مأمور السجن أو نائب المأمور على الأقل".

AHMED